[कॉपीराइट सूचना
या पुस्तकातील सर्व कविता, शीर्षके, मजकूर आणि त्यांची मांडणी यांचे सर्व हक्क लेखकाकडे सुरक्षित आहेत.
लेखकाच्या पूर्वलिखित परवानगीशिवाय या पुस्तकातील कोणताही मजकूर पूर्णतः किंवा अंशतः कोणत्याही स्वरूपात कॉपी करणे, पुनर्मुद्रित करणे, भाषांतरित करणे, प्रसारित करणे किंवा व्यावसायिक वापरासाठी वापरणे कायद्याने प्रतिबंधित आहे.
© सर्व हक्क सुरक्षित
लेखक : शिवराज भोकरे. ]
ओठांवरचं तुझं नाव
न सांगताही उमजणारं,
एक गोड गुपित असावं,
मी विसरून जावं जगाला,
पण ओठांवरचं तुझं नाव उरावं...
ते नाव घेताना हळूच,
गालावर खळी पडते,
हृदयाच्या एका कोपऱ्यात,
एक नवी सांज घडते.
कधी श्रावणातल्या सरींसारखं,
ते मनात येऊन बरसतं,
कधी चांदण्या रात्रीत मग,
माझं मन तुझ्यासाठी तरसतं
ते फक्त एक नाव नाही,
तो तर माझा श्वास आहे,
दूर असूनही तू पाठीशी,
असा तो एक भास आहे.
आयुष्याच्या या वळणावर,
ऋतू येतील आणि जातील,
पण ओठांवरचे हे बोल,
फक्त तुझंच गाणं गातील...
------------------------------
पहिली भेट
ना कसलेच नवस होते,
ना काही ठरवले होते,
त्या पहिल्या भेटीत आपण,
फक्त ऋतुच बदलले होते...
तू समोर आलीस तेव्हा,
काही सुचलेच नाही,
नजरेने नजर चोरली,
पण मन मिटलेच नाही.
एक शांत, अबोल थरथरणारं,
ते हवेतलं चांदणं होतं,
शब्दांशिवायही उमजलेलं,
ते पहिलं मागंं होतं.
हात तुझा हातात घेताना,
काळ जणू थांबला होता,
भोवतालच्या या जगाचा,
तेव्हा पत्ताच लागला नव्हता.
ती पहिली भेट अजूनही,
मनात तशीच जागी आहे,
तुझ्या माझ्या सुखाची,
तीच तर खरी सुरवात आहे...
------------------------------
पहिली नजर
नजरेने नजर मिळताच,
एक विजेचा लखलखाट झाला,
न सांगता काही मनातला,
एक नवा प्रवास सुरू झाला...
ते केवळ पाहणं नव्हतं,
तो तर एक वेध होता,
हृदयाच्या आत उमललेला,
एक सुगंधी रेख होता.
तू नजर झुकवून हसलीस,
आणि निसर्गही मोहरला,
माझ्या कोरड्या आयुष्यात,
मग प्रेमाचा श्रावण झरला.
त्या एकाच तीक्ष्ण नजरेने,
सगळे बंध तोडून टाकले,
मी माझे उरलेले जग,
तुझ्याच पायी आणून ठेवले.
आजही ती पहिली नजर,
मनात घर करून राहते,
मी जितका स्वतःला आवरतो,
तितकी ती अधिक छळते...
------------------------------
पहिलं हसू
तुझ्या ओठांवर उमललेलं,
ते पहिलं हसू अजून आठवतं,
न बोलताही मनाचं गाणं,
ते कसं हळूच गाऊन जातं...
ते केवळ हसणं नव्हतं,
तो एक मखमली इशारा होता,
माझ्या अथांग सागराला मिळालेला,
तो एक शांत किनारा होता.
तू हसलीस आणि हवेत जणू,
चांदण्यांचा सडा पडला,
माझ्या उदास, कोऱ्या मनाला,
एक नवा रंग चढला.
त्या एका छोट्याशा हसण्याने,
सगळे पडदे दूर सारले,
मी आयुष्यात जे गमावले होते,
ते तुझ्या एका हास्यात तारले.
आजही जेव्हा तू हसतेस,
तेव्हा तोच पहिला भास होतो,
तुझ्या त्या गोड खळीमध्ये,
माझा प्रत्येक श्वास जगतो...
------------------------------
पहिला स्पर्श
तुझा हात हातात घेताना,
एक अनाम शिरशिरी आली,
झाडावरून हळूच निखळलेली,
जणू एक फुलांची पाकळी झाली...
तो केवळ एक स्पर्श नव्हता,
तो तर आत्म्याचा साद होता,
दोन मनांना जोडणारा,
एक रेशमी, सुगंधी नाद होता.
बोटांमधून बोटे गुंफताना,
हृदयाचे ठोके वाढू लागले,
न बोललेले शब्द सगळे,
नसांमधून मग वाहू लागले.
त्या एका स्पर्शाने मला,
माझं अस्तित्व विसरायला लावलं,
तुझ्या मिठीच्या गाभाऱ्यात,
मी माझं जग शोधून घेतलं.
आजही तो पहिला स्पर्श,
अंगावर शहारा आणून जातो,
तू नसतानाही तुझा सुवास,
माझ्या श्वासात रेंगाळून राहतो...
------------------------------
प्रेमाची कबुली
सांगायचं तर खूप होतं,
पण शब्दच ओठांवर अडत गेले,
तुझ्या डोळ्यांत पाहताना,
माझे सगळे बहाणे संपत गेले...
आज मात्र हे आकाश साक्षी,
आणि ही मंद सांजवेळ आहे,
मनातलं तुला सांगण्याची,
आलेली हीच ती वेळ आहे.
हो, प्रेम आहे माझं तुझ्यावर,
निसर्गाच्या नियमासारखं सहज,
तुझ्याशिवाय जगण्याला आता,
उरली नाही कोणतीच गरज.
नाही मागणार मी तारे तोडून,
ना मोठमोठी खोटी आश्वसने,
मला फक्त तुझ्या सुख-दुःखात,
तुझ्या पाठीशी खंबीर असणे.
हात हातात देऊन तुझा,
फक्त एकदा 'हो' म्हणशील का?
माझ्या उरलेल्या आयुष्याचे,
एक सुंदर गाणे करशील का?...
------------------------------
न बोललेलं प्रेम
तुलाही ते कळत होतं,
मलाही ते उमजत होतं,
पण शब्दांच्या चौकटीत,
प्रेम आपलं कधीच मावत नव्हतं...
ते न बोललेलं प्रेमच तर,
आपल्याला रोज भेटवत होतं,
नजरेतून गुपिते सांगत,
हळूच गालात हसवत होतं.
कधी भर पावसात एकत्र चालताना,
दोघांमधली ती शांतता बोलत होती,
न सांगताही मनाची ओढ,
एकमेकांचा पत्ता शोधत होती.
शब्दांत मांडले की भावनांना,
कदाचित जगाची नजर लागते,
म्हणूनच की काय आपली अगतिकता,
मनातल्या मनातच सुख मागते.
आजही ते न बोललेलं प्रेम,
श्वासासारखं सोबत चालतं,
काही न सांगताही तुझं असणं,
माझ्या जगण्याला अर्थ देतं...
------------------------------
एकतर्फी प्रेम
तुला मिळवणे हा कधी,
माझा हेतूच नव्हता,
तुझ्या एका नुसत्या असण्याने,
माझा दिवस मोहरत होता...
माझं प्रेम हे फक्त माझं आहे,
त्यावर तुझा अधिकार नाही,
तुला न सांगता केलेल्या या प्रेमात,
कधीच कसला व्यवहार नाही.
तू दुसऱ्या कोणात गुंतलेली पाहताना,
हृदय थोडे नक्कीच तुटते,
पण तुझ्या चेहऱ्यावरचे ते सुख पाहून,
मनाचे चांदणे पुन्हा उमलते.
तुझ्या वाटेवर मी कधी,
माझी सावलीही पडू दिली नाही,
माझ्या डोळ्यांतील आर्जवे कधी,
तुझ्या डोळ्यांनी वाचली नाहीत.
हे एकतर्फी प्रेम माझं,
एक निखळ, पवित्र गाणं आहे,
तू माझी नसलीस तरीही,
आयुष्याने तुलाच मानणं आहे...
------------------------------
लवकरच भेटू... पुढील भागात !.....
